"ရခိုင်အောင်လံ လမ်းဘဲမာ ငိုလို့ဟိလီယင့်"
--------------------------------------------------------
ရခိုင်သူ ရခိုင်သား အစ်ကိုကြီး အစ်မကြီး ညီချေ ညမချေ အဖိုး အဘောင် အားလုံးရို့ကို အမျိုးသျိုက်ကတ်စွာကို မြင်ရလို့လေး ဂုဏ်ယူစွာနမ်း ဝမ်းသာလှပါရေ။
အမျိုးသျိုက်ကတ်လို့လေး ပွဲပြင်ကျကေ ရခိုင်သူ ရခိုင်သားချေတိက နဖူးမာ ရခိုင်အောင်လံ စတေကာ ကပ် ပါးမာ ရခိုင်အောင်လံ စတေကာ ကပ် မြင်ရစွာတိကို တဝကြီးကျေနပ်စွာနန့် ကြက်သန်းတစ်မြိုက်မြိုက်ထလောက်အောင် ဝမ်းသာပါရေ ပျော်လေးပျော်ပါရေ။
ပွဲပြင်ကျီလို့ ရခိုင်သူ ရခိုင်သားသျှေတိက အိမ်ပြန်လာကတ်ခါ ရခိုင်သူ ရခိုင်သား ပါးပြင် နဖူးပြင်တိမာ ကပ်ထားရေ ရခိုင်အောင်လံ စတေကာတိကို ခွါချပျာ နောက်ပြန် ဝေးသက်ပိုက်ခကတ်တေ ရခိုင်အောင်လံချေတိက ဇာနီရာမာ ကျလို့ ဇာနီရာမာ တင်နီခလေးဆိုစွာကို မသိခကတ်။
ရခိုင်အောင်လံချေတိက ကားလမ်းမမာ ကျကျန် လူလားလမ်းမာ ကျကျန် အိမ်သာဝမာ ကျကျန် ဟိုလူလာလေး နင်း ဒေလူလာလေး နင်း ရခိုင်အောင်လံတိက အသံပေါင်းများစွာနန့် အော် ဟိုက်ပျာ မျက်ရည်တစ်သွောသွောနန့် လမ်းဘဲမာ ငိုလို့ဟိလီယင့်။
ဂနီဆိုကေ ရန်ကုန်တိုင်းဒေသကြီး သာကေတမြို့နယ် တိုင်းရင်းသားကျေးရွာမာ ရခိုင်အောင်လံသျှေတိက ဇာလောက် ဇာလောက်ငိုလို့ဟိလိမ့်မေ မသိ။
ကိုယ်ရို့တန်ဖို့ထားရေ ရခိုင်အမျိုးသားရီးအောင်လံကို တန်ဖို့ဟိဟိနန့် သုံးစွဲကတိပါ ထိမ်းသိမ်းကတ်ပါ စောင့်ရှောက်ကတ်ပါ ဂရုစိစ်ကတ်ပါ။
ခိုင်မင်း(ဦးရာဇ်မြီ) 21/12/2016 တလင်းဂနီနိန့်
No comments:
Post a Comment